VOV4.Êđê - Tlam mmăt mbruê, ti ƀuôn prŏng Vĩnh Long, čar Vĩnh Long, êpul hgŭm ƀĭng ngă lŏ hma gưl dlông Việt Nam, phŭn bruă lŏ hma leh anăn mđĭ kyar krĭng ƀuôn sang, bruă sang čư êa čar Vĩnh Long bi mguôp mkŏ mjing lhe knăm kčưm pŏk Festival braih mdiê Việt Nam tal 5 thŭn 2021 hŏng klei nao hgŭm mơ̆ng dŭm êtuh mta mnơ̆ng dhơ̆ng êdah kdlưn.

Blŭ hlăm knăm anăn, Lương Quốc Đoàn khua bruă Đảng gưl dlông, khua kiă kriê êpul hgŭm ƀĭng ngă lŏ hma Việt Nam brei thâo, leh 35 tui ngă hdră êlan mrâo, boh nik jing 13 thŭn tui ngă hdră mtrŭn mrô 26 mơ̆ng klei kƀĭn trông tal 7, êpul khua bruă Đảng gưl dlông gưl 10 kơ bruă lŏ hma, ƀĭng ngă lŏ hma, krĭng ƀuôn sang, dhar bruă lŏ hma leh anăn bruă duh mkra krĭng ƀuôn sang ala čar drei dưi mâo lu boh tŭ năng mđing êdi. Festival jing mmông găl čiăng kơ dŭm knơ̆ng bruă mâo klei bi mtuôm, hưn mdah mnơ̆ng dhơ̆ng pô, tui duah ƀĭng hgŭm, mđĭ kyar bruă mkra mjing boh mnga bruă lŏ hma hlăm alŭ wăl leh anăn krĭng dap mnai krông Cửu Long, đru kơ dŭm knơ̆ng bruă, ƀĭng ngă lŏ hma ngă bruă tŭ dưn leh anăn đru kơ bruă mdiê braih Việt Nam ăt msĕ hŏng dŭm anăn knăl boh mnga bruă lŏ hma amâo klei ktrâo anôk, mđĭ hĭn klei bi ktưn hlăm anôk mnia mblei tar rŏng lăn.

Y-Ƀel pô mblang