VOV4.Êđê - Klei kƀĭn wưng bi hdơr 43 thŭn hruê sua wĭt klei êngiê ti knông lăn Yŭ Dhŭng leh anăn hrăm mbĭt hŏng lĭng kahan, mnuih ƀuôn sang Campuchia mâo klei dưi hŏng klei kiă kriê mdjiê djuê ana ti Camuchia (7/1) dưi mkŏ mjing hruê mbruê hlăm ai êwa hơĭt mđao, hŏng klei nao hgŭm mơ̆ng phung knuă druh mphŭn, lĭng kahan Việt Nam đru kơ ala čar mah jiăng Campuchia, phung hđeh sang hră gưl prŏng dôk hriăm ti ƀuôn prŏng Hồ Chí Minh. Blŭ hlăm klei kƀĭn anăn, pô bi ala mơ̆ng ala čar Campuchia ti ƀuôn prŏng Hồ Chí Minh Sok Dareth mñă klă: Đảng, knŭk kna, mnuih ƀuôn sang leh anăn lĭng kahan Việt Nam mâo leh klei đru, luč lu mta čiăng đru kơ mnuih ƀuôn sang Campuchia tlaih mơ̆ng klei kiă kriê mdjiê djuê ana hlăk hruê 07/01/1979 leh anăn lŏ rơ̆ng kơ ala čar Campuchia čiăng đru gang mkhư̆ lŏ wĭt hlăm klei kiă kriê anăn leh anăn đru kơ djăp mta bruă hlăm bruă krŭ wĭt leh anăn mkŏ mjing ala čar Campuchia. Mnuih ƀuôn sang Campuchia hdơr nanao kơ klei đru anei, leh anăn hdơr hruê 7/1 jing hruê lŏ kkiêng tal 2. Anei jing klei klă sĭt amâo mâo pô dưi bi msoh, amâodah wơr hĕ.

Y-Ƀel pô mblang