VOV4.Êđê- Hrue anei, bruă kƀĭn ala lŏ dơ̆ng trông čhai kơ klei čih mkra hdră mtrŭn klei kơ ngăn prăk kñăm kơru wĭt bruă duh mkra, lehanăn trông čhai online čih mkra dŭm hdră mtrŭn hlăm đa đa hdră êlan mđĭ kyar ƀuôn prŏng Cần Thơ. Tlam mbrue (6/1), Bruă kƀĭn ala bi trông hlăm êpul kơ hdră duh bi liê bruă mkra êlan dơ̆ng pral Dưr – Dhŭng tĭng nah Ngŏ wưng thŭn 2021 – 2025. Bruă phung bi ala mđing hĭn êdi klei tŭ dưn bruă iêo mkrum, tui duah ngăn prăk lehanăn hdră êlan mkra êlan. Bruă mkra êlan pral Dưr – Dhŭng anei truh 729km, mbha ngă hlăm 12 kdrêč bruă. Kơ ênoh bi liê jih jang tui si hră mơar ba mdah hŏng knŭk kna jing 146 êbâo 990 êklai prăk. Êjai dôk găn klei dleh dlan msĕ si ară anei lehanăn klei kơ prăk kăk hlăk kƀah, phung bi ala akâo ruah hdră ti kdrêč bruă srăng ngă êlâo jing yuôm bhăn hlăk mjêč ba yua snăn mkra êlâo, tĭng kơ boh tŭ dưn, hrŏng ruah hdră êlan duh bi liê... Mă klei blŭ kơ klei čih mkra hdră mtrŭn kơ dŭm mta bruă mđĭ kyar ƀuôn prŏng Cần Thơ, phung bi ala lač kñăm duah hdră iêo mkrum, mđi kyar klei hdĭp mda phung ƀuôn sang, rŭ mdơ̆ng ƀuôn prŏng Cần Thơ jing ƀuôn phŭn ti krĭng Dap Mnai krông Cửu Long, đru bi năng kơ klei mđĭ kyar kluôm lăn čar hlăm wưng kơ anăp./.

Pô mblang: Y-Khem Niê