VOV4.Êđê- Hruê mbruê 5/1, kahan ksiêm čar Gia Lai mkŏ mjing leh klei kƀĭn mklin bruă knuă thŭn 2021, mkŏ mjing hdră bruă klam thŭn 2022. Čih yap klei ngă bruă hlăm thŭn 2021, kahan ksiêm čar Gia Lai dưi ngă jăk bruă klam pô, klei ksiêm duah, bi klă klei ngă soh mâo êbeh 85,3%, klei ngă soh kjham truh kơ 90,65%.

Hlăm thŭn, êpul êya kahan ksiêm mâo mă, mtrŭt brei nao kmhal 116 čô phung ngă soh, hlăm anăn mâo 41 čô ngă soh kjham, hmao mâo mă lu anôk bi mklin, êlan dŭ mdiăng, mkăp pioh, čhĭ mnia, yua matuĭ. Klei truh hlăm êlan klông mâo klei hrŏ hlăm jih 3 hnơ̆ng čoh čuăn. Hlăm bruă gang mkhư̆ klei ruă tưp Covid-19, kahan ksiêm čar Gia Lai iêu mthưr leh dŭm êbâo čô knuă druh, lĭng kahan nao ngă bruă klam. Thŭn 2022, kahan ksiêm čar Gia Lai lŏ dơ̆ng kñăm kơ dŭm hdră êlan rơ̆ng klei êđăp ênang, mđĭ hĭn bruă gang mkhư̆ phung ngă soh mơ̆ng nah gŭ, hâo hưn, kñăm bi hrŏ jih hnơ̆ng klei ngă soh, lŏ ngă jăk bruă đru čung ba mnuih ƀuôn sang, rơ̆ng klei êđăp ênang yang ƀuôn.

Pô mblang: Y-Ƀel Êban