VOV4.Êđê- Tlam hruê 13/12, hlăm hdră nao čhưn klă klơ̆ng ti Dhŭng Korea, ti ƀuôn prŏng phŭn Seoul, Khua anôk bruă kƀĭn ala Vương Đình Huệ lehanăn Khua anôk bruă kƀĭn ala Dhŭng Korea Park Byeong Seug nao leh ti Klei bi kƀĭn trông anôk bruă duh mkra Việt Nam - Dhŭng Korea. Blŭ hrăm ti knăm anei, Khua anôk bruă kƀĭn ala Vương Đình Huệ mñă, anôk bruă kƀĭn ala Việt Nam tŭ ư lŏ mđĭ hĭn klei bi mjĕ plah wah Việt Nam - Dhŭng Korea truh ti hnơ̆ng klei bi mjĕ ƀĭng hgŭm phŭn kluôm dhuôm. Klei bi kƀĭn trông srăng mjing boh kdrŭt mtrŭt mđĭ hdră bi hgŭm plah wah dua ala čar. Hưn mthâo hŏng dŭm anôk bruă duh mkra Dhŭng Korea kơ boh klei ti Việt Nam, dŭm boh tŭ bruă ksiêm dlăng klei ruă tưp Covid 19 lehanăn hdră lŏ krŭ wĭt bruă duh mkra hlăm wưng êgao, Khua anôk bruă kƀĭn ala mñă klă leh tur knơ̆ng bruă duh mkra mơ̆ng Việt Nam ăt dôk đĭ kyar h’ĭt kjăp, Knŭk kna Việt Nam dôk mkra hdră kluôm kñăm mdrơ̆ng hŏng klei ruă Covid 19 hluê hdră hdĭp êđăp ênang, ksiêm dlăng tŭ dưn klei ruă tưp. Akŏ thŭn 2022, Việt Nam srăng lŏ pŏk ƀăng dŭm êlan phiơr hŏng tar rŏng lăn, mjing klei găl kơ dŭm anôk bruă duh mkra găn êrô, hriê mă bruă./.

Pô mblang: H’Nêč Êñuôl