VOV4.Êđê - Aguah 22/11, ti sang bruă kƀĭn ala, Mphŭn pŏk Hdră klei bi kƀĭn tal 5 mơ̆ng Dhar bruă kƀĭn ala. Mkŏ mjing hlăm 2 hruê, hlăm klei bi kƀĭn anei, Dhar bruă kƀĭn ala brei klei blŭ mguôp hlăm lu boh phŭn yuôm bhăn, hlăm anăn mâo bruă mprăp kơ klei bi kƀĭn mdê hjăn mkŏ mjing hlăm mlan 12 kơ anăp. Blŭ hrăm mphŭn pŏk klei bi kƀĭn, Khua bruă kƀĭn ala Vương Đình Huệ brei thâo, năng mđing hlăm klei bi kƀĭn anei, Dhar bruă kƀĭn ala brei klei blŭ mguôp kơ klei mtă mơ̆ng Knŭk kna kơ klei mbŏ 02 hră čih hdră bhiăn hlăm Hdră mkŏ mjing hdră bhiăn thŭn 2022 jing: Hdră bhiăn lŏ mkra mlih, mbŏ dŭm mta mơ̆ng Hdră bhiăn êlan klei pui kmlă, Hdră bhiăn ksiêm mkă, mdrao klei ruă (lŏ mlih mrâo). Khua bruă kƀĭn ala mtă brei bi klă klei čiăng êdi mbŏ 2 hră čih hdră bhiăn, boh nik hdră mĭn tĭng boh phŭn hdră êlan prŏng ksiêm dlăng hdră bi mklă hlăm 2 hră čih hdră bhiăn, msir mgaih boh klei “bi mŭt čiăng dăp mnuih”.

H’Zawut pô mblang