VOV4.Êđê - Tlam mmăt mbruê 22/11, ti sang bruă kƀĭn ala, mkŏ mjing leh knăm mđup brei mnơ̆ng bi knăl 40 thŭn bruă Đảng, mđup brei klei bi klă leh jih thŭn mă bruă mơ̆ng phŭn bruă kđi čar hŏng phung khua bruă Đảng gưl dlông gưl 12 ti bruă kƀĭn ala leh anăn mđup brei mêđai hŏng phung bi ala bruă kƀĭn ala thơ̆ng kơ bruă gưl 14 amâo lŏ djŏ ruah ti gưl 15. Hlăm knăm anăn, Khua bruă kƀĭn ala Vương Đình Huệ mđup brei leh mnơ̆ng bi knăl 40 thŭn bruă Đảng leh anăn mnga hơêč hmưi kơ khua bruă kƀĭn ala êlâo Nguyễn Thị Kim Ngân, k’iăng khua bruă kƀĭn ala êlâo Tòng Thị Phóng. Bi ala kơ Đảng, knŭk kna, Khua bruă kƀĭn ala Vương Đình Huệ mđup brei leh mêđai êngiê mrô 1 kơ k’iăng khua bruă kƀĭn ala êlâo Phùng Quốc Hiển, mđup brei mêđai êngiê mrô 2 kơ 8 čô leh anăn mêđai êngiê mrô 3 kơ 7 čô. Khua bruă kƀĭn ala Vương Đình Huệ mñă klă, dŭm čô mâo klei bi klă leh jih thŭn mă bruă leh anăn mâo mêđai tal anei jing phung mâo lu klei thâo hlăm klei ngă bruă, păn ngă lu bruă mdê mdê, klam lu bruă kmeh gơ̆ng hlăm ala čar, klei ksiêm hriăm, gĭr ktưn leh anăn đĭ hriê kơ prŏng mơ̆ng diñu jing gru mngač kơ ênuk êdei dưi tui hriăm.

Y-Ƀel pô mblang