VOV4.Êđê- Ti ƀuôn Dhar kreh – hiu čhưn ênguê dŭm djuê ana Việt Nam mkŏ mjing leh Knăm mphŭn pŏk hruê kăm “Bi hgŭm mguôp jih jang djuê ana – Knhuah gru dhar kreh Vịêt Nam” thŭn 2021. Khua bruă kƀĭn ala Vương Đình Huệ nao leh ti knăm anei. Mphŭn pŏk knăm anei, Khua bruă kƀĭn ala Vương Đình Huệ mñă klă, hluê ngă asăp mtă mơ̆ng Awa Hô “Hgŭm mguôp, hgŭm mguôp lehanăn hgŭm mguôp. Tŭ jing, tŭ jing lehanăn tŭ jing hĭn”, klei hgŭm mguôp djuê ana jing hdră êlan phŭn mơ̆ng Đảng drei, jing klei hriăm mơ̆ng hdră krŭ kgŭ kdơ̆ng Việt Nam đru mjing ai ktang, boh kdrŭt yuôm bhăn kơ hdră mlih mrâo kluôm dhuôm, ba wĭt boh tŭ dưn prŏng kơ hƀuê ênuk lăn čar drei.

Khua bruă kƀĭn ala Vương Đình Huệ čang hmăng anôk bruă mặt trận čar kwar Việt Nam srăng mđĭ lar hĭn bruă klam ksiêm dlăng, bi tăng mgăl yang ƀuôn, nao hgŭm mkŏ mkra Đảng, anôk bruă sang čư̆ êa, lŏ dơ̆ng ngă jăk bruă klam, bi hgŭm hŏng dŭm êpul êya bruă, ieue mƀĭn djăp ai dưi, klei mâo, klei thâo, klei hur har kơ bruă mơ̆ng phung kreh knhâo, phung thơ̆ng kơ bruă, mđing hmư̆ tŭ mă klei blŭ đru mguôp mơ̆ng jih jang mnuih ƀuôn sang kơ hdră êlan mtrŭn mơ̆ng Đảng, hdră bhiăn mơ̆ng knŭk kna./.

Pô mblang: H’Nêč Êñuôl