VOV4.Êđê - Tlam mmăt mbruê 20/12, ti sang bruă kƀĭn ala, Khua bruă kƀĭn ala Vương Đình Huệ mâo leh klei bi tuôm hŏng phung bi ala, khua kiă kriê anôk bruă hŏng tač êngao Việt Nam ti ala tač êngao wĭt hgŭm hlăm klei kƀĭn trông bruă hŏng tač êngao tal 31. Blŭ hlăm klei bi tuôm anăn, Khua bruă kƀĭn ala Vương Đình Huệ mâo leh klei kah mbha hŏng dhar bruă hŏng tač êngao leh anăn phung bi ala bruă hŏng tač êgnao êjai wưng dôk ngă bruă ti ala čar tač êngao, mâo dŭm anôk bruă kbưi êdi hŏng ala čar.

Hruê mmông êgao, phung bi ala leh anăn khua kiă kriê anôk bruă hŏng tač êngao Việt Nam ăt mâo klei hmăi kjham kyua klei ruă tưp Covid-19, bruă kƀĭn ala, dhar bruă gĭt gai bruă kƀĭn ala hrăm mbĭt hŏng Đảng, knŭk kna ăt mâo klei uêñ mĭn mđĭ ênoh prăk mlan kơ phung knuă druh anei. Ƀiădah lu anôk ăt dôk mâo klei dleh dlan, suăi êmăn, hlăm wưng anăn phung bi ala, khuă kiă kriê anôk bruă bi ala Việt Nam ti ala čar tač êngao ăt mâo klei gĭr ktưn găn jih dŭm klei dleh dlan čiăng ngă bruă leh anăn mâo boh tŭ dưn jăk.

Y-Ƀel pô mblang