VOV4.Êđê - Lŏ dơ̆ng klei nao cuă ala čar India, tlam mmăt mbruê, hluê si mmông alŭ wăl ti ƀuôn prŏng phŭn New Dehli, Khua bruă kƀĭn ala Vương Đình Huệ mâo leh klei blŭ hrăm hŏng khua gĭt gai Hạ việ India Om Birla. Hlăm klei blŭ hrăm anăn, Khua bruă kƀĭn ala Vương Đình Huệ bi êdah klei hơ̆k mơak leh klei mjĕ giăm jing ƀĭng hgŭm bi mguôp hdră êlan Việt Nam – India găn leh 5 thŭn leh anăn lŏ dơ̆ng đĭ kyar jăk hlăm djăp bruă, boh nik jing bruă hŏng tač êngao, bruă lĭng kahan, mnia mblei, dhar kreh leh anăn mnuih ƀuôn sang, mñă kơ 2 ala čar srăng lŏ bi mguôp mkŏ mjing hdră ngă bruă wưn thŭn 2021 -2023 knăm ba wĭt lu klei jăk klă klơ̆ng, mâo boh tŭ dưn kơ knŭk kna leh anăn mnuih ƀuôn sang 2 ala čar. Khua bruă kƀĭn ala Vương Đình Huệ mâo klei lač jăk kyua klei đru yuôm bhăn mơ̆ng India kơ Việt Nam hlăm bruă gang mkhư̆ klei ruă tưp Covid-19, tŭ drông dŭm knơ̆ng bruă mơ̆ng India mđĭ ktang bruă duh bi liê kơ Việt Nam hlăm dŭm mta bruă India mâo klei găl.

Y-Ƀel pô mblang