VOV4.Êđê- Hlăm klei nao čhưn kơ India, Khua bruă kƀĭn ala Vương Đình Huệ drông leh phung khua kiă kriê dŭm Êpul grŭp, lehanăn knơ̆ng bruă prŏng ti India. Drông aduôn Roshini Nadar Malhotram, Khua Êpul gơ̆ng kiă kriê knơ̆ng bruă kdrăp mrâo HCL jing mniê mdrŏng hĭn ala čar India, lehanăn jing mnuih dôk hlăm ênoh 100 čô mniê mâo klei dưi hĭn tui si Forbes yap thŭn 2019. Ti anôk drông knơ̆ng bruă HCL, Khua bruă kƀĭn ala Vương Đình Huệ hơêč hmưi kơ HCL jing leh sa hlăm 3 knơ̆ng bruă prŏng hĭn ti India, lehanăn bi mni sa ai jih jang bruă mơ̆ng êpul grŭp anei mă leh ti Việt Nam, boh nik hlăm bruă kdrăp mrâo, lehanăn klei mjuăt bi hriăm mnuih ngă bruă knhăk. Drông pô mdrŏng Prakash Hinduja, Êpul grŭp Hinduja sa hlăm dŭm knơ̆ng bruă găp djuê prŏng hĭn ala čar India, Khua bruă kƀĭn ala brei thâo, klei India duh bi liê ti Việt Nam adôk ƀiă mkă hŏng klei găl dưi mâo, lehanăn anôk ala mơ̆ng dua ala čar, bi êdah klei čang hmăng mơ̆ng gưl nao čhưn kơ India tal anei, ti gŭ klei kiă kriê mơ̆ng phung khua kiă kriê hlăm knŭk kna lehanăn dŭm phŭn dhar bruă India srăng mjing klei India duh bi liê prŏng kơ Việt Nam./.

Pô mblang: Y-Khem Niê