VOV4.Êđê- Aguah mbrue (13/12) hlue mmông alŭ wăl, hlăm klei nao čhưn kơ ala čar Dhŭng Korea, Khua bruă kƀĭn ala Vương Đình Huệ bi tuôm leh hŏng phung khua kiă kriê dŭm êpul grŭp, phung duh mkra prŏng Dhŭng Korea. Hlăm klei drông čhưn anei, khua bruă kƀĭn ala Vương Đình Huệ mñă, Việt Nam lehanăn Dhŭng Korea hlăk mđĭ klei bi mguôp dua nah čhuang hlăm knhuang prŏng hĭn, ƀri bi hdơr 30 thŭn mkŏ mjing klei mjĕ mgiăm. Klei hgŭm duh mkra jing sa kmeh gơ̆ng yuôm bhăn, kyua hlăm gưl nao čhưn anei lŏ mâo klei hyuă kjăp hĭng klei bi hgŭm duh mkra, mnia mblei dua nah djăp ênoh čuăn 100 êklai dolar hlăm thŭn 2023.

Ti anôk bi tuôm anăn phung khua kiă kriê êpul grŭp Samsung Electronics, Khua bruă kƀĭn ala brei thâo, Việt Nam tŭ ư hŏng hdră pŏk mlar klei knơ̆ng bruă duh bi liê hlăm wưng kơ anăp, bi myuôm hdră đru kơ Việt Nam hgŭm hlăm hdră êlan mơ̆ng Samsung duh mkra, lehanăn akâo kơ knơ̆ng bruă mâo hdră klă hĭn đru kơ phung duh mkra Việt Nam mâo ai dưi hlăm klei bi ktưn, djăpơ klei găl mă bruă mbĭt hŏng Êpul grŭp Samsung lehanăn knơ̆ng bruă anăn./.

Pô mblang: Y-Khem Niê