VOV4.Êđê - Hlăm klei nao čhưn kơ ala čar Dhŭng Korea, aguah mbrue (15/12), Khua bruă kƀĭn ala Vương Đình Huệ drông leh Khua knơ̆ng kiă kriê Êpul grŭp Amkor Technology Ji Jong-rip, lehanăn khua knơ̆ng kiă kriê Êpul grŭp ngăn prăk Hana Kim Jung-tai. Anei jing dua klei mă bruă knhal tuič, mjưh ruĕ jăk siam gưl hiu čhưn kơ ala čar Dhŭng Korea, mơ̆ng khua bruă kƀĭn ala Vương Đình Huệ lehanăn êpul khua prŏng hlăm bruă kƀĭn ala Việt Nam. Ti anôk mă bruă hŏng Amkor Technology, khua bruă kƀĭn ala Vương Đình Huệ hơêč hmưi kơ Êpul grŭp mâo jao leh leh hră tŭ yap klei duh bi liê mkŏ mkra kdrăp bán dẫn ti čar Bắc Ninh hŏng ênoh duh bi liê đĭ truh 1 êklai 600 êklăk dolar. Khua bruă kƀĭn ala mñă, Việt Nam sa ai lehanăn ƀuăn srăng hrăm mbĭt hŏng Êpul Grŭp Amkor Technology hlăm bruă hlue ngă, lehanăn ba yua bruă anei, mjing djăp klei găl kơ Êpul Grŭp dưi duh bi liê lehanăn mđĭ kyar bruă knuă kjăp ti Việt Nam. Hlăm klei drông Êpul grŭp ngăn prăk Hana (Hana Financial Group), Khua bruă kƀĭn ala Vương Đình Huệ akâo kơ Hanabank lŏ dơ̆ng đru hdră elan kiă kriê ênuk mrâo, djăp hdră duh mkra mrâo hlăm kdrăp mă bruă mrâo mrang, mtrŭt mđĭ hĭn klei bi mguôp hŏng dŭm ƀĭng hgŭm mơ̆ng Dhŭng Korea pŏk phai bruă duh bi liê ti Việt Nam./.

Y-Khem pô mblang