VOV4.Êđê- Bri wưng aduôn Marketa Pakarová Adamova dưi čuăn ruah jing khua gĭt gai Hạ Viện ala čar Seck, Khua bruă kƀĭn ala Vương Đình Huệ mơĭt leh hră hơêč hmưi. Hlăm hră anăn, Khua bruă kƀĭn ala Vương Đình Huệ bi êdah klei hơ̆k mơak kyua ƀuh klei bi hgŭm knhuah gru leh anăn klei bi mguôp lu mta bruă plah wah Việt Nam – Seck hlăm hruê mmông êgao lŏ srăng đĭ kyar hĭn, êlam hĭn, klei bi mguôp plah wah dŭm anôk bruă čih mkra klei bhiăn 2 ala čar dưi rơ̆ng kjăp, mtrŭt mđĭ wăt kơ 2 tĭng leh anăn alŭ wăl. Hlăm hruê mmông kơ anăp, Khua bruă kƀĭn ala Vương Đình Huệ hmăng hmưi srăng hrăm mbĭt hŏng khua gĭt gai Hạ Viện ala čar Seck lŏ bi mguôp, mtrŭt mđĭ hĭn klei jing ƀĭng hgŭm leh anăn bi hgŭm mguôp 2 ala čar, anôk bruă čih mkra klei bhiăn 2 ala čar, kjăp hĭn, êlam hĭn, mâo boh tŭ dưn klă klơ̆ng, kyua klei jăk kơ 2 ala čar, klei êđăp ênang, hơĭt kjăp, mdrŏng sah hlăm alŭ wăl leh anăn tar rŏng lăn.

Pô mblang: Y-Ƀel Êban