VOV4.Êđê- Tŭ klei iêo jak mơ̆ng khua bruă kƀĭn ala Dhŭng Korea Park Byeong Seug, Khua bruă kƀĭn ala Vương Đình Huệ leh anăn êpul bi ala gưl dlông Việt Nam truh leh tač êdeh phiơr Incheon, ƀuôn prŏng phŭn Seoul, kčưm klei nao čuă ala čar Dhŭng Korea mơ̆ng hruê 12 -15/12. Tŭ drông ti tač êdeh phiơr kơ tĭng ala čar Dhŭng Korea mâo k’iăng êpul khua hgŭm bruă Dhŭng Korea – Việt Nam Suh Jung-Sook.

Hlăm klei nao čuă anei, Khua bruă kƀĭn ala Vương Đình Huệ leh anăn êpul bi ala gưl dlông Việt Nam srăng mâo klei mă bruă, blŭ hrăm hŏng khua gĭt gai gưl dlông Dhŭng Korea, bi tuôm hŏng dŭm êpul êya, phung bi ala mơ̆ng Dhŭng Korea, nao hgŭm hlăm klei kƀĭn dŭm knơ̆ng bruă kdlưn hĭn ti Dhŭng Korea. Ktuê dlăng knăm bi klă dŭm klei kuôl kă bi mguôp mơ̆ng dŭm phŭn, dhar bruă, alŭ wăl, knơ̆ng bruă. Boh nik, pô bi ala knŭk kna 2 ala čar srăng bi klă klei kuôl kă kơ ênua yang 2 nah plah wah 2 ala čar.

Pô mblang: Y-Ƀel Êban