VOV4.Êđê - Bri hlăm wưng nao čuă ala čar India, Khua bruă kƀĭn ala Vương Đình Huệ leh anăn êpul bi ala gưl dlông Việt Nam nao čuă leh phung knuă druh, mnuih mă bruă ti anôk bruă bi ala Việt Nam ti India, bi tuôm hŏng êpul êya mnuih ƀuôn sang Việt Nam ti India. Blŭ hrăm hŏng phung knuă druh, phung mă bruă ti anôk bruă bi ala Việt Nam leh anăn êpul êya mnuih ƀuôn sang Việt Nam ti India. Khua bruă kƀĭn ala Vương Đình Huệ mñă klă mnuih ƀuôn sang ti nei jing sa kđeh êrah, amâo dưi bi ktlah, boh nik hŏng hdră êlan bi mguôp djuê ana mơ̆ng Đảng leh anăn knŭk kna hluê si hdră mtrŭn mrô 36 leh anăn asăp mtrŭn mrô 45 mơ̆ng phŭn bruă kđi čar kơ bruă mnuih ƀuôn sang Việt Nam dôk ti ala tač êngao. Hruê mmông kơ anăp, bruă kƀĭn ala, knŭk kna srăng gĭt gai kơ dŭm anôk bruă bi leh kdrăp klei bhiăn ala čar, mlih mrâo klei ngă hră mơar knŭk kna, mkŏ mjing tur knơ̆ng klei bhiăn hrăm mbĭt kơ bruă ksiêm dlăng klei bhiăn ala čar kơ mnuih ƀuôn sang Việt Nam dôk ti ala tač êngao. Khua bruă kƀĭn ala Vương Đình Huệ hmăng hmưi, hruê mmông kơ anăp srăng dưi ƀuh lu klei êdah kdlưn hlăm klei mjĕ giăm 2 ala čar, ăt msĕ hŏng ktuê dlăng dŭm klei êdah kdlưn mơ̆ng phung knuă druh, mnuih mă bruă ti anôk bruă bi ala leh anăn mnuih ƀuôn sang Việt Nam dôk ti ala čar India.

Y-Ƀel pô mblang