VOV4.Êđê- Mmăt mbruê, sang mđup rup bruă kƀĭn ala Việt Nam mkŏ mjing leh knăm bi hdơr 7 thŭn hruê mđung rup hdră tal êlâo hĭn (06/01/2015 – 06/01/2022) leh anăn ba mdah kdrăp wăl hdĭp mrô. Khua bruă kƀĭn ala Vương Đình Huệ, k’iăng khua bruă kƀĭn ala Trần Thanh Mẫn nao hgŭm hlăm knăm anei. Blŭ hlăm knăm anăn, Khua bruă kƀĭn ala Vương Đình Huệ hmăng hmưi, sang mđung rup bruă kƀin ala srăng lŏ bi lar kơhưm pô, bruă klam jing sang mđung rup klă klơ̆ng ala čar, amâo mdei klei mlih mrâo, đĭ kyar hnơ̆ng tŭ jăk, jing kdrông klei đăo knang plah wah bruă kƀĭn ala hŏng phung bi ala, mnuih ƀuôn sang hlăm ala čar, ti anôk phung bi ala dôk, sang mđung rup bruă kƀĭn ala dôk ti năn.

Ƀri wưng anei, sang mđung rup bruă kƀĭn ala ba mdah wăl hdĭp mrô hlăm mbah internet ti hla pŏk quochoitv.vn. Anei dưi hmăng hmưi jing sa mta kñăm mrô kơ bruă ngă mơ̆ng bruă kƀĭn ala, khua gĭt gai bruă kƀĭn ala, dŭm anôk bruă kƀĭn ala, phung bi ala bruă kƀĭn ala, jing tur knơ̆ng bi mguôp, blŭ hrăm leh anăn đru kơ phung bi ala hlăm kluôm ala.

Pô mblang: Y-Ƀel Êban