VOV4.Êđê -  Ti sang kdŏ mmuñ prŏng ƀuôn prŏng Hà Nội, mkŏ mjing leh knăm pah mni leh anăn mđup brei klei pah mni “Ƀĭng ngă lŏ hma Việt Nam kdlưn hĭn thŭn 2021”. Khua bruă kƀĭn ala Vương Đình Huệ nao hgŭm hlăm knăm anăn. Hlăm knăm anăn Khua bruă kƀĭn ala Vương Đình Huệ mbĭt hŏng phung khua gĭt gai Đảng, knŭk kna mđŭp brei leh mêđai, hră pah mni kơ 63 čô ƀĭng ngă lŏ hma kdlưn hĭn bi ala kơ dŭm êklăk ƀĭng ngă lŏ hma kdlưn hĭn ti ala čar.

Blŭ hlăm knăn anăn, khua kiă kriê dhar bruă gưl dlông mặt trận čar kwar Việt Nam Đỗ Văn Chiến mñă klă, Đảng leh anăn knŭk kna bi klă, bruă lŏ hma, ƀĭng ngă lŏ hma leh anăn krĭng ƀuôn sang mâo klei yuôm bhăn hlăm bruă bi mrâo mrang, mđĭ kyar leh anăn răng mgang ala čar. Êpul mkŏ mjing mâo leh klei bi klă mđup brei klei pah mni ƀĭng ngă lŏ hma Việt Nam kdlưn hĭn thŭn 2021 kơ 63 čô hŏng 5 êpul: Rông mnơ̆ng dhơ̆ng, pla mjing, đang war, kan hdang, bruă mkra mjing, mnia mblei bruă lŏ hma, bruă thâo mkra mjing, mlih mrô, mâo bruă ngă kdlưn hĭn hlăm bruă mkŏ mkra krĭng ƀuôn sang mrâo leh anăn rang mgang ala čar.

Y-Ƀel pô mblang