VOV4.Êđê - Mmăt hruê 5/12, Anôk bruă kiă kriê klei hâo hưn gưl dlông mkŏ mjing leh Hdră bruă mjĕ mjuk kluôm ala dŭm gru mngač êdah êdi hlăm hdră tui hriăm lehanăn hluê ngă klei mĭn, knhuah hdĭp, knhuah mă bruă mngač Hồ Chí Minh mâo anăn “Hồ Chí Minh – Ktuê êlan čang hmăng 2021”. Dăl hlăm hdră bruă anei jing klei yăl dliê mgei ai tiê kơ Awa, kơ dŭm gru mngač hlăm klei hdĭp aguah tlam hlăm bruă tui hriăm klei mĭn, knhuah hdĭp, knhuah mă bruă mngač Hồ Chí Minh.

Bi ala phung khua kiă kriê Đảng, Knŭk kna, Khua bruă kƀĭn ala Vương Đình Huệ h’êč hmưi lehanăn bi mni kơ dŭm êpul êya, mnuih êdah êdi hlăm kluôm ala lehanăn mnuih ƀuôn sang dôk ti ala tač êngao. Hlăm bruă hluê ngă Asăp mtrŭn 05 kơ bruă “Mtrŭt mđĭ hdră tui hriăm lehanăn hluê ngă klei mĭn, knhuah hdĭp, knhuah mă bruă mngač Hồ Chí Minh”, hlăk lehanăn dôk mâo lu gru mngač êdah êdi, đru mtrŭt mđĭ ai phung knuă druh Đảng viên lehanăn mnuih ƀuôn sang gĭr tui hriăm lehanăn hluê ngă klei mĭn, knhuah hdĭp, knhuah mă bruă mngač Hồ Chí Minh. Khua bruă kƀĭn ala Vương Đình Huệ čang hmăng Anôk bruă kiă kriê klei hâo hưn gưl dlông lehanăn dŭm anôk bruă djŏ tuôm lŏ dơ̆ng krơ̆ng kjăp lehanăn mđĭ lar hĭn boh tŭ yuôm bhăn anei./.

H’Nêč pô mblang