VOV4.Êđê - Lŏ dơ̆ng kơ dŭm bruă ngă hlăm klei nao čuă klă klơ̆ng ala čar Dhŭng Korea, Khua bruă kƀĭn ala Vương Đình Huệ nao hgŭm leh klei kƀĭn jhưng wĭl hŏng dŭm êpul grŭp prŏng ti ala čar Dhŭng Korea mơ̆ng knơ̆ng bruă Kim and Chang mkŏ mjing. Blŭ hlăm klei kƀĭn anăn, Khua bruă kƀĭn ala Vương Đình Huệ mñă klă, klei mjĕ giăm plah wah Việt Nam – Dhŭng Korea dôk hlăm wưng đĭ kyar jăk leh anăn dôk mprăp kơ klei bi hdơr 30 thŭn 2 ala čar mkŏ mjing klei mjĕ giăm bruă hŏng tač êngao thŭn 2022. Hlăm gưl klei nao čuă anei, Khua bruă kƀĭn ala Vương Đình Huệ brei thâo, ñu ktuê dlăng leh knăm bi klă leh anăn ba jao hră bi klă, dŭm klei kluôl kă duh bih liê plah wah dŭm knơ̆ng bruă, alŭ wăl mơ̆ng 2 ala čar hŏng ênoh giăm 10 êklăk USD, ƀuăn srăng ba lu ai êwa mrâo kơ bruă duh bi liê, mnia mblei plah wah 2 ala čar hlăm wưng mrâo. Hlăm klei kƀĭn anăn, pô bi ala dŭm knơ̆ng bruă mơ̆ng Dhŭng Korea mâo leh klei kčĕ mtrŭt mđĭ ba čhĭ braih đru kơ Việt Nam, hmăng hmưi dưi ksiêm duah hdră êlan mơ̆ng Việt Nam hŏng bruă mđĭ kyar ôtô êran hŏng pui kmlă, đru kčĕ Việt Nam mkŏ mjing leh anăn nao hgŭm hlăm bruă mobile money, knơ̆ng bruă ngăn prăk mrô, ksiêm dlăng klei bi hrŏ prăk jia, mâo hdă êlan iêo mthưr duh bi liê hlăm krĭng ƀuôn sang, mđĭ kyar bruă duh mkra krĭng ƀuôn sang, êpul bi mguôp…

Y-Ƀel pô mblang