VOV4.Êđê- Tlam mbruê, ti sang bruă kƀĭn ala, Khua bruă kƀĭn ala Vương Đình Huệ tŭ drông leh pô bi ala mơ̆ng Dhŭng Korea Park Noh-Wan ti Việt Nam. Hlăm klei tŭ drông anăn, Khua bruă kƀĭn ala Vương Đình Huệ mñă klă, Việt Nam leh anăn Dhŭng Korea mâo klei mjĕ giăm jing ƀĭng hgŭm, thŭn 2022, 2 ala čar srăng bi hdơr 30 thŭn mkŏ mjing klei mjĕ giăm, klei čuăn ruah čiăng kơ 2 ala čar đĭ hnơ̆ng mrâo dôk mâo lu sơnăk.

Boh nik hlăm hruê mmông êgao, klei mjĕ giăm 2 ala čar mơ̆ng dŭm mbah knŭk kna, bruă kƀĭn ala, klei bi mguôp mnuih ƀuôn sang 2 ala čar mâo nanao klei mđĭ, wăt dôk hlăm wưng klei ruă tưp Covid-19, khua gĭt gai 2 ala čar mâo leh dŭm klei blŭ hrăm êlan online leh anăn klă anăp. Sa ai hŏng klei bi êdah mơ̆ng pô bi ala Dhŭng Korea, Khua bruă kƀĭn ala Vương Đình Huệ brei thâo, Đảng, knŭk kna leh anăn mnuih ƀuôn sang Việt Nam dôk gĭt gai hnưm wĭt pŏk dŭm êlan phiơr hŏng ala tač êngao, mâo dŭm klei bi mgrơ̆ng kơ hră tŭ yap leh tlŏ vaccine. Knŭk kna, dŭm phŭn, dhar bruă djŏ tuôm dôk gĭt gai kơ boh klei anei.

Pô mblang: Y-Khem Niê