VOV4.Êđê- Tlam leh anăn mmăt hruê 18/11, Khua hlăm Dhar bruă Đảng gưl dlông, Khua čih hră Bruă kƀĭn ala, Khua dlăng adŭ bruă kƀĭn ala Bùi Văn Cường hŏng êpul mă bruă nao hlăm knăm bi hgŭm djuê ana hŏng mnuih Bahnar, ƀuôn Đăk Wớt Yốp, să Hơ Moong, kdriêk Sa Thầy leh anăn mă bruă hŏng bruă Đảng čar Kon Tum. Blŭ hrăm ti anôk bi tuôm, Khua čih hră bruă kƀĭn ala čang hmăng mnuih ƀuôn sang lŏ dơ̆ng mđĭ lar ai tiê bi hgŭm, mđing truh hluê ngă jăk dŭm klei mtrŭt mjhar leh anăn hdră bi lông ktưn khăp kơ ala čar čiăng hrăm mbĭt bi đru mđĭ kyar bruă duh mkra mkra mđĭ klei hdĭp.

Hlăm mmông mă bruă hŏng bruă Đảng čar Kon Tum, Khua čih hră bruă kƀĭn ala Buì Văn Cường bi êdah klei hơ̆k mơak ti anăp klei mlih mrâo jăk kơ bruă duh mkra, dhar kreh, ala ƀuôn mơ̆ng čar Kon Tum hlăm wưng giăm anei. Klei anei bi êdah klă hlăm ai êwa hơ̆k mơak mơ̆ng Knăm mơak bi hgŭm djuê ana hlăk dưi mkŏ mjing hlăm dŭm boh ƀuôn hlăm čar. Khua čih hră bruă kƀĭn ala Buì Văn Cường mđup brei kơ čar Kon Tum 1 êklai prăk đru alŭ wăl pŏk ngă hdră gang mkhư̆ klei ruă Covid-19 leh anăn mđup brei 5 boh sang bi hgŭm hŏng ênoh êbeh 250 êklăk prăk.

Pô mblang: H’Zawut Ƀuôn Yă