VOV4.Êđê- Mă bruă hŏng khua gĭt gai čar Vĩnh Phúc kơ klei tŭ mkŏ mjing pŏk ngă Hdră mtrŭn Klei bi kƀĭn Đảng kluôm ala tal 13 leh anăn Hdră mtrŭn Klei bi kƀĭn Đảng čar Vĩnh Phúc tal 17, Khua bruă kƀĭn ala Vương Đình Huệ lač: leh 25 thŭn, čar Vĩnh Phúc gĭr ktưn ktang, jing anôk êdah kdlưn kơ klei đĭ kyar bruă duh mkra - ala ƀuôn , kơ iêô jak duh bi liê hlăm krĭng bruă duh mkra phŭn nah Dưr leh anăn hlăm kluôm ala. Blŭ hrăm hlăm mmông mă bruă, Khua bruă kƀĭn ala Vương Đình Huệ mtă kơ čar Vĩnh Phúc lŏ dơ̆ng pŏk ngă tŭ dưn Hdră mtrŭn Klei bi kƀĭn tal 13 mơ̆ng Đảng leh anăn Hdră mtrŭn Klei bi kƀĭn tal 17 bruă Đảng čar, dŭm asăp mtrŭn, hdră mtrŭn, hdră kčah mơ̆ng Gưl dlông kơ bruă mkŏ mjing Đảng. Kƀĭn h;uê ngă mbruă, tŭ dưn gang mkhư̆ klei ruă tưp êjai, kơrŭ wĭt, mđĭ kyar bruă duh mkra- ala ƀuôn, răng mgang jih hnơ̆ng klei suaih pral, klei hdĭp mnuih ƀuôn sang hŏng klei kƀĭn ruh mgaih dleh dlan kơ bruă mkra mjing, mnia blei, đru tŭ dưn kơ mnuih ƀuôn sang leh anăn anôk bruă duh mkra.

Pô mblang: H’Zawut Ƀuôn Yă