VOV4.Êđê- Bi hdơr 75 thŭn Hruê kluôm ala čar bi blah 19/12, aguah 17/12, Êpul bi ala ƀuôn prŏng Hà Nội nao myơr brui mngưi ti Knưl “Săn asei kơ lăn čar hnŭk êngiê”, đang mnga Hàng Đậu, ƀuôn hgŭm Quán Thánh, kdriêk čar Ba Đình. Hruê 19/12, 75 thŭn êlâo, mđing truh Asăp iêô mthưr kluôm ala bi blah mơ̆ng Khua gĭt gai Hồ Chí Minh, lĭng kahan leh anăn mnuih ƀuôn sang Hà Nội yơr hla čhiăm gru “Săn asei kơ lăn čar hnŭk êngiê” - bi hmô hdơr kơ klei tŭ dưn jhŏng ktang mơ̆ng kahan leh anăn ƀuôn sang ƀuôn prŏng hlăm 60 hruê mlam bi kdơ̆ng hŏng kahan Prăng knhal jih thŭn 1946 , akŏ thŭn 1947, khua gĭt gai ƀuôn prŏng bi êdah klei hdơr knga kơ ai tiê đru mguôp, klei săn asei mơ̆ng dŭm gưl ênuk aê ama nao êlâo, phung lĭng kahan, mnuih ƀuôn sang mjing leh hƀuê ênuk, jing klei ktưn hưn mơ̆ng lu mnuih ƀuôn sang Hà Nội hruê anei leh anăn mgi dih. Khua gĭt gai ƀuôn prŏng ƀuăn gĭr jih ai tiê gĭt gai bruă Đảng, bruă sang čư̆ êa, lĭng kahan leh anăn mnuih ƀuôn sang Hà Nội lŏ dơ̆ng mđĭ lar knhuah gru bi hgŭm, hrăm mbĭt sa ai tiê mkŏ mjing leh anăn mđĭ kyar ƀuôn prŏng năng hŏng bruă klam jing anôk phŭn bruă kđi čar - hră mơar ala čar mơ̆ng kluôm ala.

Pô mblang: H’Zawut Ƀuôn Yă