VOV4.Êđê- Aguah mbruê 18/11, ti anôk bruă Đảng gưl dlông, mkŏ mjing leh klei kƀĭn mơ̆ng êpul gĭt gai gưl dlông kơ bruă gang mkhư̆ klei ƀơ̆ng ngăn, klei amâo jăk ti gŭ klei kiă kriê mơ̆ng khua gĭt gai Đảng Nguyễn Phú Trọng. Klei kƀĭn kñăm bi trông, brei boh blŭ gĭt gai ƀuah mkra dŭm klei ngă soh, bruă hlăm êpul gĭt gai ksiêm dlăng, gĭt gai, bruă bi mlih, bi mbŏ hdră mă bruă leh anăn klei bi klă mbha bruă klăm kơ phung khua hlăm êpul gĭt gai.

Hlăm klei kƀĭn, êpul khua gĭt gai bi tŭ ư, mơ̆ng klei kƀĭn tal 19 mlan 1/2021 mơ̆ng êpul gĭt gai truh kơ ară anei, dŭm gưl bruă Đảng, êpul êya bruă Đảng, anôk bruă djŏ tuôm mâo leh lu klei gĭr ktưn, ngă jăk dŭm klei bi klă mơ̆ng êpul gĭt gai, boh nik jing hyuă kjăp, ngă bruă klam gang mkhư̆ dŭm klei amâo jăk nao mbĭt hŏng bruă gang mkhư̆ klei ƀơ̆ng ngăn, mta knăm jing klei amâo jăk hlăm klei mĭn bruă kđĭ čar, knhuah hdĭp. Êpul gĭt gai ăt bi klă bruă hmao ƀuh, ƀuah mkra dŭm klei ngă soh, klei ƀơ̆ng ngăn, klei amâo jăk mâo leh lu boh tŭ dưn êdah kdlưn hĭn.

Pô mblang: Y-Ƀel Êban