VOV4.Êđê- Aguah mbruê, ti anôk bruă knŭk kna, ti gŭ klei gĭt gai mơ̆ng Khua knŭk kna Phạm Minh Chính, knŭk kna mkŏ mjing leh klei kƀĭn online kluôm ala tui ngă klei bi klă mơ̆ng gưl dlông leh anăn hdră mtrŭn mơ̆ng bruă kƀĭn ala gưl 15, hdră êlan mđĭ kyar bruă duh mkra ala ƀuôn thŭn 2022 kơ anăp. Nao hgŭm leh anăn blŭ hlăm klei kƀĭn anăn, Khua gĭt gai Đảng Nguyễn Phú Trọng lač klă, hruê mmông kơ anăp, knŭk kna srăng kñăm ngă tŭ dưn hdră êlan krŭ wĭt leh anăn mđĭ kyar bruă duh mkra ala ƀuôn, nao mbĭt hŏng bruă kñăm ksiêm dlăng klei prăk luč ênoh, rơ̆ng klei hơĭt bruă duh mkra prŏng leh anăn klei bi knar dŭm anôk bruă duh mkra.

Lŏ bi jăk hĭn wăl mnia mblei, mtrŭt mđĭ klei đĭ kyar hmar leh anăn kjăp, klă klơ̆ng hĭn. Khua knŭk kna Phạm Minh Chính mñă klă, klei kƀĭn trông anei srăng kñăm hlăk mblang, čih yap boh tŭ dưn tui ngă bruă klam kđi čar thŭn 2021, bi klă dŭm klei êdah kdlưn leh anăn ktrâo klă dŭm klei ka djŏ, klei êgun kpăk, phŭn gha ngă truh, boh nik jing phŭn gha čŏng pô. Mbĭt anăn lŏ kčĕ lu hdră êlan mgaih msir, bi klông klă nik leh anăn bi tŭ ư kơ mta kñăm, bruă kñăm, hdră êlan ngă bruă kđi čar yuôm bhăn mâo Đảng, knŭk kna leh anăn mnuih ƀuôn sang jao leh.

Pô mblang: Y-Ƀel Êban