VOV4.Êđê -  Tlam mbrue (15/12), ti anôk bruă Đảng gưl dlông kdrăp k’ah mkŏ mjing leh knăm mđup brei kơ Khua gĭt gai Đảng Nguyễn Phú Trọng, klei pah mni Lenin mơ̆ng Êpul khua gĭt gai Đảng Cộng sản Russia. Mâo Leoñit Kalassñikop, k’iăng khua bruă Đảng, khua kiă kriê bruă hgŭm hŏng dŭm ala čar êngiê, bi mguôp Asi – Ơrôp lehanăn phung ƀuôn sang hdĭp kơ ala tač êngao mơ̆ng Duma ala čar Russia, bi ala kơ êpul khua kiă kriê Đảng Cộng sản Russia mđup brei leh kơ khua gĭt gai Đảng Cộng sản Việt Nam Nguyễn Phú Trọng klei pah mni yuôm bhăn hĭn mơ̆ng Đảng Cộng sản Russia.

Blŭ hrăm hlăm knăm anei, Khua gĭt gai Đảng Nguyễn Phú Trọng lač, Đảng Cộng sản Việt Nam mă hdră êlan mơ̆ng Lenin, klei mĭn Hồ Chí Minh mjing atur kơ klei mĭn, jing giê ktrâo hlăm bruă rŭ mdơ̆ng, răng mgang lehanăn mđĭ kyar lăn čar, čoh čuăn hdră êlan đĭ nao kơ yang ƀuôn êngiê ngă phŭn. Khua gĭt gai Đảng Nguyễn Phú Trọng lač, Đảng Cộng sản Russia, lehanăn ala čar hgŭm Russia lŏ dơ̆ng bi kjăp, mđĭ hĭn klei bi mguôp kluôm ênŭm hŏng Việt Nam, lehanăn klei hgŭm mbĭt phung ƀuôn sang dua ala čar./.

Y-Khem pô mblang