VOV4.Êđê- Aguah hruê 23/12, Anôk bruă kiă kriê klei hâo hưn gưl dlông mkŏ mjing leh Klei bi kƀĭn kluôm ala ksiêm wĭt hdră bruă kiă kriê klei hâo hưn gưl dlông thŭn 2021 lehanăn pŏk ngă bruă hlăm thŭn 2022. Klei bi kƀĭn dưi mkŏ mjing hluê hdră klă anăp mguôp hŏng online ti dŭm anôk mkŏ hlăm kluôm ala. Thŭn 2021, hŏng ai tiê pral kdal, gĭr ktưn, hluê ngă kjăp klei gĭt gai mơ̆ng Phŭn bruă kđi čar, Anôk kriê dlăng bruă Đảng lehanăn dŭm gưl, dhar bruă; anôk bruă kiă kriê klei hâo hưn mâo leh klei bi mlih mrâo kơ hdră ngă bruă, pŏk ngă kluôm dhuôm hdră mă bruă, bi leh jih bruă klam mâo kčah jao.

Mơ̆ng anăn, đru mguôp yuôm bhăn hluê ngă tŭ jing dŭm bruă klam kđi čar mơ̆ng dŭm gưl bruă Đảng, anôk bruă sang čư̆ êa, anôk bruă mặt trận čar kwar lehanăn dŭm êpul bruă kđi čar – ala ƀuôn. Blŭ hrăm ti knăm anei, Khua hlăm Anôk kriê dlăng bruă Đảng Võ Văn Thưởng mtă, hlăm wưng ti anăp, anôk bruă kiă kriê klei hâo hưn lŏ dơ̆ng mlih mrâo, mđĭ hnơ̆ng tŭ jăk, boh tŭ dưn hdră kiă kriê klei hâo hưn ti dŭm gưl. Nao hgŭm hlăm hdră mkŏ mkra anôk bruă Đảng kjăp ktang hlăm bruă kđi čar, ai tiê klei mĭn lehanăn knhuah hdĭp. Võ Văn Thưởng mtă brei mtrŭt mđĭ hdră ksiêm hriăm, hyuă kjăp, mtô mblang, pŏk hluê ngă Hdră mtrŭn Klei bi kƀĭn tal 13 lehanăn dŭm Hdră mtrŭn, asăp mtrŭn, klei kčah mtrŭn mơ̆ng Đảng./.

                                                    Pô mblang: H’Nêč Êñuôl