VOV4.Êđê- Mmăt 23/11, hluê si mmông Việt Nam, ƀri gưl nao čhưn ti Japon, Khua knŭk kna Phạm Minh Chính bi tuôm hŏng phung kreh knhâo Việt Nam ti Japon. Hlăm klei bi tuôm, phung kreh knhâo hưn mdah leh hŏng Khua knŭk kna dŭm mta mnơ̆ng, klei tŭ ksiêm dlăng mrâo hlăm dŭm mta bruă msĕ si điện tử, pui kmlă mkrab mjing, mdrao mgŭn, klei kreh knhâo anak mnuih… Hơêč hmưi, bi kah mbha klei mơak hŏng phung kreh lmhâo, Khua knŭk kna mñă klă brei mđĭ lar ênoh yuôm anak mnuih, klei kreh knhâo Việt Nam, mbĭt anăn mtă leh anăn akâo blei dŭm klei ksiêm hriăm dôk čiăng ba yua hlăm klei hdĭp. Khua knŭk kna čang hmăng phung kreh knhâo Việt Nam ti japon lŏ dơ̆ng gĭr ktưn ksiêm hriăm, mâo lu klei tŭ dưn êdeh kdlưn hĭn, ba yua jih klei bi hgŭm hŏng phung kreh knhâo, dŭm êpul bruă kreh knhâo dlông rŏng lăn, ba klei thâo, ai tiê pô duh myơr kơ ƀuôn sang, lăn čar leh anăn đru mguôp mklra mđĭ klei bi hgŭm plah wah dua ala čar Việt Nam - Japon. Ăt hlăm mmăt hruê 23/11, Khua knŭk kna  Phạm Minh Chính mâo leh mmông bi tuôm hŏng êpul êya Việt Nam ti Japon, Khua knŭk kna bi mklă, Đảng, Knŭk kna mjing nanao klei găl jăk hĭn čiăng mnuih Việt Nam ti ala tač êngao đru mguôp mkŏ mjing leh anăn mđĭ kyar lăn čar.

Pô mblang: H’Zawut Ƀuôn Yă