VOV4.Êđê- Adŭ bruă knŭk kna mrâo mâo leh hră mtrŭn kơ klei kiă kriê mơ̆ng khua knŭk kna Phạm Minh Chính čiăng dưi ksiêm dlăng kman mlih mrâo Omicron mơ̆ng mta kman Sar CoV 2, hlăk dôk tưp lar pral ti lu ala čar dlông rŏng lăn. Čiăng dưi ksiêm dlăng gang mkhư̆ klei ruă tưp. Khua knŭk kna Phạm Minh Chính mtă leh kơ Phŭn bruă mdrao mgŭn čŏng ksiêm dlăng jih jang boh klei mơ̆ng mta kman mrâo Omicron pô ngă, bi trông nanao hŏng Êpul hgŭm bruă mdrao mgŭn dlông rŏng lăn čiăng pral mâo klei hâo hưn, klă mngač kơ mta kman anei, mơ̆ng anăn mâo dŭm hdră êlan răng mgang bi djŏ. Phŭn bruă mdrao mgŭn, Phŭn bruă hŏng tač êngao, Phŭn bruă êlan klông, Phŭn bruă kahan ksiêm, Phŭn bruă lĭng kahan lehanăn dŭm phŭn dhar bruă djŏ tuôm mkăn dưi jao bruă kiă kriê djăp êpul ngă bruă mđĭ hĭn klei ksiêm dlăng mnuih mŭt kbiă mơ̆ng ala tač êngao găn nao hlăm dŭm ala čar mâo leh kman Omicron mŭt hriê kơ Việt Nam, čiăng dưi gang mkhư̆ klei bi mtưp kman truh hŏng ala čar drei./.

Pô mblang: Y-Ƀel Êban