VOV4.Êđê - Tlam hrue mbrue 5/12, Khua knŭk kna Phạm Minh Chính kiă kriê klei bi kƀĭn online Êpul phung khua prŏng hlăm knŭk kna hŏng 8 čar hlăm alŭ wăl Dhŭng kwar Krah lehanăn Lăn Dap Kngư kơ bruă mdrơ̆ng hŏng boh mơ̆ng klei êa lip lêč. Nao ti anôk bi kƀĭn anei ti dŭm čar Thưà Thiên Huế, Quảng Nam, Quảng Ngãi, Bình Định, Phú Yên, Khánh Hoà, Gialai, Daklak mâo leh Khua knơ̆ng bruă sang čư̆ êa čar, lehanăn phung khua kiă kriê dŭm knơ̆ng dhar bruă êpul êya djŏ tuôm. Blŭ hrăm ti anôk bi kƀĭn, Khua knŭk kna Phạm Minh Chính brei thâo, hlăm wưng leh êgao hjan prŏng ê alip lehanăn ba klei luič liê prŏng kơ mnuih lehanăn ngăn dŏ, mnơ̆ng dhơ̆ng pla mjing... ti 8 boh čar Dhŭng Kwar krah lehanăn Lăn Dap Kngư. Knŭk kna gĭt gai lehg lehanăn tiŏ nao leh êpul ngă bruă truh hlăm dŭm čar hlăm alŭ wăl, čiăng hrăm mbĭt hŏng alŭ wăl mghaih msir boh mơ̆ng klei êa lip lêč. Hlăm wưng kơ anăp khua knuk kna mtă mghaih msir bi pral boh mơ̆ng klei êa lip lêč, boh nik bi mdoh wăl hdĭp mda, êpul kahan ƀuôn, nao đru bi mdoh sang hră mơar, sang êa drao gŭn, hrui êmiêt djah djâo, mnơ̆ng rông djiê, ngă klei mdjiê kman, krŭ wĭt bruă duh mkra mnia mblei, lehanăn klei hdĭp lŏ wĭt msĕ hŏng yăng đar, lehanăn mdrơ̆ng hŏng klei ruă tưp./.

Y-Khem pô mblang