VOV4.Êđê - Hlăm klei bi kƀĭn knŭk kna grăp gưl mlan 11/2021 mkŏ mjing aguah 2/12 ti anôk bruă Knŭk kna, Khua knŭk kna Phạm Minh Chính mtă krah mlan 12 bi leh bruă tlŏ vaccin aruăt tal 2 kơ phung mơ̆ng 18 thŭn kơ dlông, brei kƀĭn tlŏ kơ phung hđeh mơ̆ng 12 thŭn kơ dlông čiăng kơ phung hđeh lŏ wĭt hriăm ti sang hră hŏng klei êđăp ênang leh anăn mâo hdră klă klơ̆ng čiăng pŏk tlŏ aruăt tal 3. Blŭ hrăm klah čŭn klei bi kƀĭn, Khua knŭk kna Phạm Minh Chính lač klă, klei ruă tưp ară anei klă klơ̆ng dưi ktuê dlăng hlăm kluôm ala, tal êlâo dưi ngă hdră kñăm kčah leh, dưi mjing klei đaŏ knang leh anăn klei hơ̆k mơak kơ mnuih ƀuôn sang, anôk bruă duh mkra krŭ wĭt mđĭ kyar. Kơ bruă klam hlăm wưng kơ anăp, Khua knŭk kna mtă kơ dŭm phŭn, dhar bruă, alŭ wăl lŏ dơ̆ng păn kjăp, đaŏ knăl boh klei, boh nik kơ klei ruă Covid-19, gĭr hluê ngă “mdrơ̆ng êđăp ênang, mbruă, dưi ktuê dlăng tŭ dưn klei ruă Covid-19 hluê si Hdră mtrŭn 128 mơ̆ng Knŭk kna.

H’Zawut pô mblang