VOV4.Êđê- Aguah mbrue (6/1), Khua knŭk kna Phạm Minh Chính nao ti anôk bi kƀĭn bruă ngăn prăk thŭn 2021, lehanăn hlue ngă bruă ngăn prăk thŭn 2022. Blŭ hrăm ti anôk bi kƀĭn, Khua knŭk kna Phạm Minh Chính mtă, Dhar bruă ngăn prăk bi kiă kriê bruă ngăn prăk knŭk kna thŭn 2022 hŏng klei kjăp, mkiêt mkriêm, tŭ dưn, dôk hlăm knua bruă kƀĭn ala tĭn mkă leh, rơ̆ng dưi ngă dŭm bruă čuăn bi liê hlăm dŭm bruă tŭ dưn, tal êlâo hĭn kơ bruă gang mkhư̆ klei ruă tưp Covid 19, dŭm bruă hlăk mjêč, bi pral knơ̆ng prăk bi liê dŭm bruă pioh kơrŭ wĭt bruă duh mkra, kñăm mđĭ kyar klei hdĭp mda.

Khua knŭk kna đăo knang hŏng klei juăt leh hlăm 76 thŭn rŭ mdơ̆ng lehanăn mđĭ kyar, hŏng klei gĭr prŏng mơ̆ng jih jang phung khua kiă kriê, mnuih ngă bruă mơ̆ng dhar bruă ngăn prăk kñăm lŏ dơ̆ng gĭr hĭn găn bi dưi klei dleh dlan, klei lông dlăng bi leh jih mta kñăm kơ bruă ngăn prăk knŭk kna, ngă jăk hdră kơrŭ wĭt bruă duh mkra, bi leh hdră êlan mđĭ kyar kơ thŭn 2022 hlăm kluôm ala, mjing klei găl dưi ngă jăk hĭn hdră mđĭ kyar bruă duh mkra 5 thŭn 2021 - 2025, lehanăn hdră êlan kơ 10 thŭn 2021 –2030, tui si hdră mtrŭn mơ̆ng klei bi kƀĭn prŏng Đảng gưl 13./.

Pô mblang: Y-Khem Niê