VOV4.Êđê- Tlam mbruê, Khua knŭk kna Phạm Minh Chính leh anăn Khua knŭk kna Belanda Mark Rutte mâo leh klei blŭ hrăm êlan đĭng blŭ, bi trông kơ hdră êlan klei bi mguôp kluôm 2 ala čar Việt Nam - Belanda hlăm hruê mmông kơ anăp. Khua knŭk kna Phạm Minh Chính yap yuôm bhăn leh anăn mâo klei lač jăk kyua knŭk kna Belanda, êpul êya dŭm knơ̆ng bruă Belanda mkăp brei leh kơ ala čar Việt Nam kdrăp yua bruă mdrao mgŭn hŏng ênoh êbeh 40 êklai prăk đru kơ ala čar Việt Nam găn wưng dleh dlan kyua klei ruă tưp Covid-19 gưl bluh đĭ tal 4. Mñă klă Việt Nam yap yuôm bhăn klei bi mguôp hŏng Belanda. Khua knŭk kna Việt Nam hmăng hmưi Belanda lŏ đru kơ Việt Nam bi mguôp dŭm anôk mnia blei leh anăn anôk bruă tuh tia hŏng Ơrôp, đru mđĭ mnơ̆ng dhơ̆ng ba čhĭ kơ ala tač êngao mơ̆ng Việt Nam hlăm dŭm anôk mnia mblei anei, mtrŭt mđĭ bruă mnia mblei leh anăn duh bi liê plah wah 2 ala čar, ktang hĭn, kjăp hĭn. 2 čô Khua knŭk kna bi tŭ ư rơ̆ng kơ klei blŭ hrăm leh anăn dŭm hdră êlan ti mguôp tač ksĭ, mtô mjuăt bi hriăm, hiu čhưn ênguê.

Pô mblang: Y-Ƀel Êban