VOV4.Êđê- Aguah 23/11/2021, ti Tokyo, ala čar Japon, hlăm gưl nao čhưn klă sĭt ti Japon, Khua knŭk kna Phạm Minh Chính drông leh Khua knŭk kna hđăp Japon Suga Yoshihide,  Khua čih hră Đảng êngiê ngă phŭn hđăp (LDP), Khua Êpul hgŭm phung ngă bruă kƀĭn ala Japon- Việt Nam Nikai Toshihiro leh anăn phung hlăm êpul hgŭm. Khua knŭk kna Phạm Minh Chính mñă klă, Japon jing ƀĭng hgŭm yuôm bhăn mrô sa mơ̆ng Việt Nam; bi êdah klei hơ̆k mơak ƀuh klei bi hgŭm hdră bruă kluôm Việt Nam - Japon hlăk lŏ dơ̆ng dĭ kyar ktang, kluôm hlăm jih jang dŭm mta bruă hŏng klei đaŏ knang bruă kđi čar. Khua knŭk kna Phạm Minh Chính bi mni kơ dŭm klei đru mguôp jăk, tŭ dưn mơ̆ng Khua knŭk kna hđăp Suga leh anăn Khua êpul hgŭm Nikai ăt msĕ mơh dŭm phung hlăm Êpul hgŭm ngă bruă kƀĭn ala Việt Nam - Japon hlăm bruă mđĭ ktang klei bi hgŭm hdră bruă kluôm plah wah dua ala čar amâo mdei mđĭ kyar leh anăn tŭ dưn hlăm dŭm mta bruă, mđĭ ktang klei bi hgŭm bruă mnia blei, duh bi liê leh anăn mjĕ êrô mnuih ƀuôn sang, bi mni lač jăk kơ klei bi hgŭm, sĭt suôr hŏng lăn čar leh anăn mnuih ƀuôn sang Việt Nam.

Pô mblang: H’Zawut Ƀuôn Yă