VOV4.Êđê - Tlam hruê 16/12, ti Anôk bruă knŭk kna, Khua knŭk kna Phạm Minh Chính – Khua anôk bruă ala čar gĭt gai hdră gang mkhư̆ Covid 19 gĭt gai leh klei bi kƀĭn online hŏng 63 čar, ƀuôn prŏng čiăng tĭng dlăng lehanăn tă hdră msir klă klơ̆ng kñăm bi hrŏ ênoh mnuih ruă đĭ kơ kjham, djiê; mtrŭt mđĭ pral hdră tlŏ mgang, mđĭ hdră ngă bruă mdrao mgŭn ti dŭm anôk bruă nah gŭ. Anei jing klei bi kƀĭn dưi mkŏ mjing hlăk mta kman mrâo Omicron dôk bluh đĭ mâo WHO hưn brei răng kơ hnơ̆ng tưp lar pral, kyua anăn iêu mthưr jih jang ala čar hlăm tar rŏng lăn brei răng, amâo dưi ngă ngơi. Khua knŭk kna Phạm Minh Chính mñă klă, ară anei, klei ruă hlăm ala čar ăt dleh dưi ksiêm dlăng; ti dŭm čar, ƀuôn prŏng ênoh mnuih djiê ka dưi ksiêm dlăng kjăp ôh, kyua anăn, dŭm alŭ wăl brei bi trông, hrăm mbĭt hlăm kluôm ala ba mdah hdră msir klă klơ̆ng čiăng mkhư̆ klei tưp lar hlăm êpul êya, boh nik ênoh mnuih ruă đĭ kơ kjham, djiê. Hluê si Khua knŭk kna Phạm Minh Chính, brei mđing bi trông kơ dŭm hdră mđĭ pral klei tlŏ mgang kơ phung hđeh mơ̆ng 12 truh kơ 18 thŭn čiăng kơ phung hđeh anei hnưm lŏ dưi nao sang hră. Dŭm čar, ƀuôn prŏng hluê ngă kjăp hdră gang mkhư̆ klei ruă tưp djŏ guôp, rơ̆ng kjăp hdră duh mkra mnia mblei./.

H’Nêč pô mblang