VOV4.Êđê- Aguah mbruê 10/12, Khua knŭk kna Phạm Minh Chính, khua êpul gĭt gai ala čar kơ bruă gang mkhư̆ klei ruă tưp Covid-19, gĭt gai leh klei kƀĭn online kluôm ala hŏng êpul gĭt gai bruă gang mkhư̆ klei ruă tưp Covid-19 63 čar, ƀuôn prŏng kơ bruă gang mkhư̆ klei ruă tưp Covid-19. Blŭ hlăm klei kƀĭn anăn, Khua knŭk kna Phạm Minh Chính mñă klă, dŭm hruê giăm anei, klei ruă tưp dleh dưi ksiêm dlăng, mâo lu mnuih ruă hlăm êpul êya yang ƀuôn, mnuih ruă đĭ kjham leh anăn djiê, klei kƀĭn anei čiăng bi trông kơ 8 êpul bruă ngă kñăm, čiăng mâo hdră êlan klă klơ̆ng, hluê anăn čiăng rơ̆ng klei mđrăm mbĭt dŭm êpul gĭt gai dŭm čar, dŭm kdriêk truh kơ să kơ mta kñăm, hdră êlan gang mkhư̆ klei ruă tưp Covid-19 čiăng mâo klei kjăp, klă klơ̆ng, kreh knhâo, djŏ guôp leh anăn mâo boh tŭ dưn. Khua knŭk kna lŏ mñă, hnui êdi hruê 31/12 srăng tlŏ mgang ênŭm 2 aruăt vaccine kơ mnuih mơ̆ng 18 thŭn kơ dlông, tlŏ aruăt tal 3 kơ phung mâo klei hyưt hĭn. Dŭm alŭ wăl mâo hdră êlan hâo hưn, mđĭ klei thâo săng kơ mnuih ƀuôn sang, ksiêm dlăng mnuih ƀuôn sang hlăm wưng thŭn mrâo leh anăn yan Tết čiăng mâo klei êđăp ênang.

Pô mblang: Y-Ƀel Êban