VOV4.Êđê- Khua knŭk kna Phạm Minh Chính leh anăn êpul ngă bruă mơ̆ng knŭk kna mâo leh klei mă bruă hŏng klhua gĭt gai kmeh gơ̆ng čar Hưng Yên kơ bruă mkŏ mjing Đảng, boh sĭt klei đĭ kyar bruă duh mkra ala ƀuôn leh anăn bruă mkŏ mjing Đảng thŭn 2021, hdră êlan, bruă klam thŭn 2022. Kơ hdră êlan, bruă klam hlăm hruê mmông kơ anăp, Khua knŭk kna mñă klă: Ngă hur har bruă mlih mrâo, hŏng klei mbruă, mđĭ hĭn klei đĭ kyar kluôm ênŭm, hmar leh anăn kjăp, mđĭ kyar bruă tuh tia hŏng kdrăp mrâo mrang, bruă tuh tia mâo ênoh đĭ ktang, mrâo mrang. Mđĭ kyar bruă duh mkra ala ƀuôn nao mbĭt hŏng bruă kriê pioh, bi lar dŭm klei yuôm bhăn knhuah gru, hƀuê ênuk leh anăn răng mgang wăl hdĭp mda, mgaih msir jăk dŭm boh klei hlăm yang ƀuôn. Bi kơ bruă gang mkhư̆ klei ruă tưp Covid-19, ngă jăk dŭm hdră êlan hdĭp êđăp ênang, hŏng klei mbruă, ksiêm dlăng tŭ dưn klei ruă tưp Covid-19, lŏ mđĭ hĭn bruă hâo hưn kơ mnuih ƀuôn sang, ngă djŏ 5 klei mtă mơ̆ng phung bruă mdrao mgŭn, amâo ngơi mang, mkŏ mjing jăk bruă tlŏ mgang vaccine.

Pô mblang: Y-Ƀel Êban