VOV4.Êđê - Tlam 22/12, Khua knŭk kna Phạm Minh Chính leh anăn êpul mă bruă mơ̆ng Knŭk kna mă leh bruă hŏng khua gĭt gai kmeh gơ̆ng čar Quảng Bình. Leh hmư̆ klei blŭ mơ̆ng dŭm Phŭn, dhar bruă Gưl dlông leh anăn khua gĭt gai čar Quảng Bình Khua Knŭk kna Phạm Minh Chính bi mni kơ klei tŭ mơ̆ng čar Quảng Bình dưi mâo leh hlăm wưng êgao, Khua knŭk kna mñă klă, thŭn 2021, khăgơ̆ tuôm lu hŏng klei dleh dlan ƀiădah bruă Đảng, bruă sang čư̆ êa leh anăn mnuih ƀuôn sang Quảng Bình gĭr ktưn, dưi mâo klei tŭ jăk. Khua knŭk kna lač, thŭn 2022 ăt jing thŭn yuôm bhăn čiăng hluê ngă Hdră mtrŭn Klei bi kƀĭn tal XIII leh anăn klei bi kƀĭn Đảng dŭm gưl.

Hdră kñăm jing mđĭ kyar hơĭt kjăp, mđĭ klei hdĭp ai tiê mnơ̆ng dhơ̆ng mnuih ƀuôn sang hơĭt kjăp kđi čar, rơ̆ng klei êđăp ênang leh anăn jưh hlăm klei găl mdê hjăn. Khua knŭk kna mtă kơ Quảng Bình ktuê dlăng klei ruă tưp tŭ dưn, mjêč bi leh hdră kñăm tlŏ vaccin aruăt tal 2 kơ phung mơ̆ng 18 thŭn hlăm mlan 12, bi leh aruăt tal 3 hlăm gưl I/2022.

H’Zawut pô mblang