VOV4.Êđê- Tlam hruê 2/12, Khua knŭk kna Phạm Minh Chính gĭt gai leh mmông mă bruă hluê hdră online mơ̆ng Khua knŭk kna hŏng phung khua kiă kriê phŭn mơ̆ng ƀuôn prŏng Đà Nẵng kơ hdră mđĭ kyar bruă duh mkra – ala ƀuôn. Khua knŭk kna Phạm Minh Chính čih pioh, bi mni dŭm klei gĭr mơ̆ng phung khua kiă kriê, dŭm anôk bruă Đảng, bruă sang čư̆ êa alŭ wăl, lĭng kahan lehanăn mnuih ƀuôn sang ƀuôn prŏng Đà Nẵng hlăm hdră gang mkhư̆ klei ruă Covid 19 lehanăn hdră mđĭ kyar bruă duh mkra – ala ƀuôn hlăm wưng êgao.

Mbĭt anăn, Khua knŭk kna hưn mdah leh dŭm klei êdu kƀah hlăm hdră duh mkra, hdră mđĭ kyar ka năng hŏng klei găl mâo lehanăn klei mđing dlăng mơ̆ng Đảng, Knŭk kna. Hlăm wưng ti anăp, Khua knŭk kna mtă kơ ƀuôn prŏng Đà Nẵng mđĭ lar ai tiê hgŭm mguôp, gĭr ktưn, mjing klei dleh jing klei ênưih, mlih mrâo, msir mghaih klei dleh dlan gĭr ktưn kpưn đĭ. Mbĭt anăn mtă kơ dŭm Phŭn, dhar bruă hluê ngă kjăp bruă klam mơ̆ng pô, đru ruh mghaih klei dleh dlan, gun kpăk mjing klei găl kơ Đà Nẵng đĭ kyar./.

Pô blang: H’Nêč Êñuôl