VOV4.Êđê - Yang hruê dơ̆ng hluê mmông Việt Nam, Khua knŭk kna Phạm Minh Chính mbĭt hŏng êpul mă bruă gưl dlông ala čar drei nao čhưn leh ti Japon hluê asăp jak iêu mơ̆ng Khua knŭk kna Japon Kishida Fumio. Gưl nao čhưn klă klơ̆ng ti Japon tal êlâo mơ̆ng Khua knŭk kna Phạm Minh Chính mâo mkŏ mjing hlăk klei bi mjĕ dua ala čar dôk hlăm wưng jăk siam hĭn hlăm hƀuê ênuk mơ̆ng leh mkŏ mjing klei bi mjĕ, mâo klei đăo knang.

Gưl nao čhưn jing knhuang nao yuôm bhăn hlăm hdră êlan bi mjĕ hŏng tač êngao hnŭk êngiê, ngă phŭn mil pô, kyua klei êđăp ênang, mjĕ mjuk, hgŭm bruă lehanăn đĭ kyar dưi bi mklă leh ti Klei bi kƀĭn bruă Đảng kluôm ala tal XIII. Việt Nam jing ƀĭng găp, jing ƀĭng hgŭm jĕ giăm, đăo knang mơ̆ng Japon lehanăn sa ai hŏng Japon mđĭ lar bruă klam ti krĭng lehanăn tar rŏng lăn, hrăm mbĭt hŏng Japon đru mguôp kơ klei êđăp ênang, h’ĭt kjăp, hgŭm bruă lehanăn mđĭ kyar ti krĭng wăl. Việt Nam mprăp hŏng Japon pŏk sa wưng đĭ kyar mrâo, klă sĭt, tŭ dưn hlăm djăp mta ra bruă, boh nik hlăm bruă duh mkra, bruă lĭng kahan – răng mgang klei êđăp ênang alŭ wăl, bi mjĕ mjuk mnuih ƀuôn sang./.

H’Nêc pô mblang