VOV4.Êđê - Aguah mbruê 22/11, Khua knŭk kna Phạm Minh Chính ba anăp êpul bi ala Việt Nam, mbĭt hŏng phung khua gĭt gai ASEAN leh anăn khua gĭt gai China Tập Cận Bình nao hgŭm leh hlăm klei kƀĭn trông gưl dlông  online ƀri wưng bi hdơr 30 thŭn klei blŭ hrăm ASEAN – China. Blŭ hlăm klei kƀĭn trông anăn, mđing truh kơ mgi dih, Khua knŭk kna Phạm Minh Chính mnă ktang kơ bruă ASEAN leh anăn China čiăng mđĭ hĭn klei bi mguôp hlăm hdră êlan leh anăn kluôm ênŭm, mđĭ hĭn dŭm boh tŭ dưn, mđing kơ bruă bruă kñăm dlông hĭn, klei jăk hĭn kơ klei bi hgŭm ASEAN – China.

Khua knŭk kna mñă klă, ti dlông tur knơ̆ng jing ala čar riêng gah, klei bi mguôp jăk siam hŏng China, Việt Nam srăng lŏ gĭr ktưn bi mbŏ klei bi hgŭm ASEAN – China đĭ djŏ hnơ̆ng klei bi mguôp kluôm ênŭm, đru hlăm bruă bi kjăp, mđi klei êđăp ênang, hơĭt kjăp, bi mguôp hlăm alŭ wăl leh anăn tar rŏng lăn, ba wĭt klei jăk klă klơ̆ng kơ grăp ala čar leh anăn klei trei mđao, mơak mñai kơ mnuih ƀuôn sang, amâo lui sa čô dôk kơ tluôn.

Y - Ƀel pô mblang