VOV4.Êđê- Aguah mbruê 25/11, lŏ čuê hlăm klei nao čuă klă klơ̆ng ala čar Japon, Khua knŭk kna Phạm Minh Chính nao hgŭm leh hlăm klei kƀĭn trông mtrŭt mđĭ duh bi liê Việt Nam – Japon hŏng akŏ “Việt Nam - Japon” mđĭ klei mjĕ giăm, bi mguôp hrăm mbĭt đĭ kyar”. Hlăm klei kƀĭn anăn, Khua knŭk kna Phạm Minh Chính brei thâo, ñu mrâo mâo leh klei blŭ hrăm hŏng Khua knŭk kna Japon Kishida Fumio leh anăn 2 tĭng bi tŭ ư mâo klei bi klă mbĭt, mñă klă klei mjĕ giăm Việt Nam – Japon dôk mâo klei đĭ kyar jăk hĭn mơ̆ng êlâo truh kơ ară anei.

Anei jing wăl jăk čiăng mtrŭt mđĭ klei bi mguôp, mđĭ kyar djăp mta bruă plah wah 2 ala čar, hlăm anăn mâo bruă bi mguôp mđĭ kyar bruă duh mkra. Khua knŭk kna Phạm Minh Chính lŏ brei thâo, Việt Nam mâo lu klei êdah kdlưn čiăng kơ phung duh bi liê mâo klei hơĭt tơdah duh bi liê hŏng ênoh prăk lu leh anăn sui, Việt Nam srăng ngă klei găl hĭn čiăng kơ dŭm knơ̆ng bruă dưi duh bi liê mâo boh tŭ dưn ti ala čar Việt Nam.

Pô mblang: Y-Ƀel Êban