VOV4.Êđê - Aguah mbruê, Khua knŭk kna Phạm Minh Chính nao hgŭm leh anăn blŭ hlăm hră “75 klei kčĕ, hgao klei dleh dlan, mđĭ kyar” mơ̆ng êpul hgŭm mnuih mă bruă Việt Nam mkŏ mjing. Hdră anei dưi mtrŭt mjhar leh klei tŭ jing mơ̆ng klei kƀĭn kluôm Đảng tal 13, jing hruê mmông kluôm ala čar dôk gĭr ktưn gang mkhư̆ klei ruă tưp Covid-19. Leh giăm 80 hruê gĭr ktưn ngă bruă, mâo leh 250.177 klei kčĕ nao hgŭm, êgao êbeh 300% mkă hŏng hdră čoh čuăn. Mta phŭn klei kčĕ nao hgŭm hlăm hdră anei jing lu jơr, mâo lu mta bruă mdê mdê. Blŭ hlăm hdră anăn, Khua knŭk kna Phạm Minh Chính pah mni leh anăn hơêč hmưi dŭm êpul êya leh anăn grăp čô mâo klei kčĕ leh anăn bruă ngă kdlưn hĭn dưi pah mni hlăm hdră anei. Khua knŭk kna mñă klă, Đảng leh anăn knŭk kna mâo nanao klei uêñ mĭn, yap yuôm bhăn dŭm klei kčĕ, klei thâo grăp gưl mnuih ƀuôn sang, boh nĭk jing phung mnuih mă bruă. Khua knŭk kna hmăng hmưi hdră “1 êklăk klei kčĕ – gĭr ktưn găn klei dleh dlan, gĭr ktưn dưi hŏng klei ruă tưp Covid-19” srăng lŏ čuê klei tŭ jing anei, bi lar ktang phĭt, mâo boh tŭ dưn, đru mguôp lu hĭn kơ grăp anôk bruă, êpul êya leh anăn grăp čô.

Y- Ƀel pô mblang