VOV4.Êđê - Aguah mbruê, ti ƀuôn prŏng Đồng Hới, čar Quảng Bình, êpul khua bruă Đảng gưl dlông, bruă kƀĭn ala, Khua lăn čar, knŭk kna, dhar bruă mặt trận čar kwar Việt Nam leh anăn čar Quảng Bình mkŏ mjing leh knăm bi hdơr 110 thŭn hruê k’kiêng kơ Đại Tướng Võ Nguyên Giáp (25/8). Khua knŭk kna Phạm Minh Chính nao hgŭm leh anăn răk hră bi hdơr. Hlăm knăm bi hdơr anăn, Khua knŭk kna Phạm Minh Chính mñă klă, asei knhuah hdĭp leh anăn dŭm klei đru mguôp prŏng prĭn mơ̆ng Đại tướng Võ Nguyên Giáp hlăm bruă krŭ kdơ̆ng Việt Nam leh anăn dlông rŏng lăn srăng lă lar dưi čih pioh hlăm hƀuê ênuk djuê ana leh anăn hƀuê ênuk krŭ kdơ̆ng tar rŏng lăn.

Ƀri hlăm knăm kdrưh k’ang anei, bi ala kơ Đảng, knŭk kna, Khua knŭk kna Phạm Minh Chính mtă kơ dŭm gưl bruă, dhar bruă, alŭ wăl leh anăn hmăng hmưi phung knuă druh, lĭng kahan kluôm ala lŏ bi lar hĭn ai tiê bi mguôp, hrăm mbĭt, sa ai, iêo mthưr klei nao hgŭm wăt kơ bruă kđi čar, mnuih ƀuôn sang kluôm ala, mnuih ƀuôn sang Việt Nam dôk ti ala tač êngao lŏ mđĭ hĭn klei khăp kơ ala čar, mâo klei mĭn kjăp, klei tang bi mguôp djuê ana leh anăn klei hmăng hmưi gĭr ktưn, găn jih dŭm klei dleh dlan, klei lông dlăng ti anăp, gĭr ktưn ngă tŭ jing hdră mtrŭn hlăm klei kƀĭn kluôm Đảng tal 13.

Y-Ƀel pô mblang