VOV4.Êđê- Blŭ hrăm ti anôk bi kƀĭn gưl dlông ASEAN kơ klei hgŭm hlăm krĭng kyua klei đĭ kyar kluôm lehanăn kjăp mâo mkŏ mjing leh aguah mbrue (30/11) hŏng hdră online. Khua knŭk kna Phạm Minh Chính mâo leh klei akâo kơ klei hgŭm krĭng wăl hlăm wưng mrâo bi mđing kơ 3 mta phŭn kơ klei mđĭ kyar kjăp. Blŭ hrăm ti anôk bi kƀĭn, Khua knŭk kna Phạm Minh Chính mñă, klei bi mguôp hlăm bruă hgŭm, lehanăn hyuă kjăp klei bi đru plah wah dŭm ala čar jing hdră êlan yuôm bhăn hĭng truh kơ klei mđĭ kyar kjăp.

Lehanăn dưn yua bi tŭ jing djăp mta klei găl pŏk mlar hlăm krĭng mjing klei găl kơ bruă duh mkra mnia mblei, klei duh bi liê mơ̆ng phung duh mkra, lehanăn klei bi hgŭm bruă knŭk kna lehanăn êngao knŭk kna. Khua knŭk kna lŏ mñă, klei đăo knang, mơ̆ng klei bi hgŭm tal êlâo hgŭm bruă hlăm krĭng tal anei, srăng krơ̆ng, lehanăn hyuă kjăp hĭn klei bi mguôp mđĭ kyar kơ krĭng ASEAN kơ mgi dih, đru bi leh bruă rŭ mdơ̆ng yang ƀuôn ASEAN đĭ kyar kjăp, mguôp hŏng klei êđăp ênang, hơĭt kjăp hlăm alŭ wăl lehanăn tar rŏng lăn./.

Pô mblang: Y-Khem Niê