VOV4.Êđê - Tŭ ư asăp jak iêu mơ̆ng Khua knŭk kna Campuchia Hunsen, Khua knŭk kna Phạm Minh Chính  djă akŏ Êpul Việt Nam nao ti Klei kƀĭn bi trông bruă Duh mkra Asi – Ơrôp (ASEM) tal 13 mơ̆ng hruê 25 – 26/11/2021 hluê hdră online. Anei jing hdră bruă yuôm bhăn mơ̆ng klei bi hgŭm ASEM hlăm 3 thŭn êgao lehanăn dưi mkŏ mjing djŏ hŏng wưng bi hdơr 25 thŭn hruê mkŏ mjing klei bi kƀĭn trông (1996 – 2021). Nao ti knăm anei, mâo khua kiă kriê gưl dlông lehanăn pô bi ala mơ̆ng 53 ala čar hlăm ASEM. Hŏng anăn “Bi kjăp hdră êlan lu tĭng kyua klei đĭ kyar kluôm”, phung khua kiă kriê ASEM bi trông leh kơ klei gĭr mbĭt lehanăn hdră bi hgŭm lu tĭng hlăm bruă msir mghaih klei lông dlăng hlăm krĭng wăl lehanăn tar rŏng lăn, mdrơ̆ng hŏng klei ruă Covid 19, lŏ krŭ wĭt lehanăn mđĭ kyar bruă duh mkra h’ĭt kjăp, mđĭ klei bi hgŭm hlăm yang ƀuôn lehanăn bruă dhar kreh. Phung khua kiă kriê ăt bi trông kơ boh klei bruă kđi čar, bruă duh mkra, ala ƀuôn ti krĭng lăn lehanăn bi trông kơ hdră kñăm mtrŭt mđĭ hĭn klei bi hgŭm ASEM./.

H’Nêč pô mblang