VOV4.Êđê - Mmăt mbruê(hluê si mmông alŭ wăl), Khua knŭk kna Phạm Minh Chính mbĭt hŏng êpul bi ala gưl dlông Việt Nam truh leh ti Tokyo, klă klơ̆ng kčưm klei nao čuă ala čar Japon tui si klei iêo jak mơ̆ng Khua knŭk kna Japon Kashida Fumio. Hluê si hdră hlăm klei nao čuă anăn, Khua knŭk kna Phạm Minh Chính srăng mâo klei blŭ hrăm hŏng Khua knŭk kna Japon Kashida Fumio, ktuê dlăng knăm bi klă dŭm hră mơar klei bi mguôp, bi tuôm hŏng khua gĭt gai Thượng Viện Japon Santo Akiko, khua gĭt gai Hạ Viện Hosoda Hiroyki. Ƀri hlăm wưng nao čuă anei, Khua knŭk kna Phạm Minh Chính lŏ mâo klei bi tuôm hŏng êpul êya bruă kđi čar yang ƀuôn Japon, Khua knŭk kna Japon êlâo Shinzo Abe, nao hgŭm hlăm klei kƀĭn dŭm knơ̆ng bruă 2 ala čar, klei kƀĭn trông mtrŭt mđĭ duh bi liê, klei kƀĭn trông bi mguôp dŭm alŭ wăl, bi tuôm hŏng dŭm êpul group, êpul êya bruă duh mkra prŏng ti Japon. Khua knŭk kna ăt srăng lŏ mâo klei bi tuôm hŏng phung knuă druh, phung mă bruă bi ala Việt Nam, êpul êya mnuih dôk mă bruă, tui hriăm, hdĭp mda ti ala čar Japon.

Y-Ƀel pô mblang