VOV4.Êđê- Aguah hruê 10/1, ti anôk bruă Knŭk kna, Khua knŭk kna Phạm Minh Chính lehanăn Khua knŭk kna ala čar Lao Phankham Viphavanh hrăm mbĭt gĭt gai Klei bi kƀĭn tal 44 Dhar bruă mlir knŭk kna kơ hdră bi hgŭm dua nah Việt Nam – Lao. Dua tĭng trông čhai bi tŭ ư, bi mklă dŭm dŭm klah čŭn mơ̆ng dua Phŭn bruă kđi čar lehanăn Klei kuôl kă Hdră kčah bi hgŭm plah wah dua ala čar hlăm thŭn 2022, tŭ ư mkŏ mjing lehanăn hluê ngă bruă kjăp mơ̆ng akŏ thŭn mtam kñăm mtrŭt mđĭ hdră bruă kđi čar – bruă răng mgang ala čar – bruă lĭng kahan, bruă duh bi liê – mnia mblei. Dŭm boh phŭn lehanăn hdră tă mâo bi trông ti anôk bi kƀĭn tal anei mâo boh tŭ yuôm bhăn hlăm bruă bi sĭt klei kuôl kă hgŭm bruă gưl dlông, đru kơ dŭm Phŭn, dhar bruă, alŭ wăl, anôk bruă duh mkra dua ala čar mjing klei jăk găl hĭn hlăm bruă pŏk hdră bi hgŭm, mđing truh kơ bruă hluê ngă tŭ jing Hdră kčah hgŭm bruă thŭn 2022. Leh klei bi kƀĭn, dua Khua knŭk kna nao dlăng leh knăm bi mklă, bi klă 9 mta hră m’ar bi hgŭm plah wah Knŭk kna hŏng dŭm phŭn, dhar bruă, alŭ wăl, anôk bruă duh mkra dua ala čar./.

                                                    Pô mblang: H’Nêč Êñuôl