VOV4.Êđê- Khua lăn čar Nguyễn Xuân Phúc mrâo mâo hră pah mni Êpul hgŭm mnuih mă bruă Việt Nam kơ bruă mtrŭt mjhar leh anăn ngă tŭ jing hdră “75 êbâo klei kčĕ bruă, găn hgao klei dleh dlan leh anăn đĭ kyar” hlăm wưng bi hdơr 75 thŭn hruê mnuih mă bruă ti Việt Nam. Hdră anei dưi mtrŭt mjhar hlăm phung hđeh êdam êra công đoàn, mnuih mă bruă knŭk kna, mnuih mă bruă dŭm gưl mơ̆ng dŭm gưl bruă, dhar bruă, knơ̆ng bruă hlăm kluôm ala. Khua lăn čar lač, hdră 75 êbâo klei kčĕ bruă, găn hgao klei dleh dlan leh anăn đĭ kyar jing hdră klă klơ̆ng kyua klei mă bruă, leh anăn jing phŭn agha mkŏ mjing ngăn drăp mdrŏng sah hlăm ala čar. Hdră anei đru râo leh anăn mtrŭt mđĭ klei thâo mbruă dhar kreh mrâo hlăm anôk bruă, knơ̆ng bruă. Grăp čô mnuih mă bruă mâo klei hur har, klei khăp, đru mguôp kơ anôk pô mă bruă. Khua lăn čar Nguyễn Xuân Phúc bi êdah klei đăo knang leh anăn hơêč hmưi kơ êpul hgŭm mnuih mă bruă Việt Nam lŏ dưi bi lar hdră anei, lŏ mâo lu hĭn hdră mâo klei yuôm bhăn leh anăn tŭ dưn hĭn. Đru mđĭ hĭn klei hơ̆k mơak leh anăn klei hmăng hmưi gĭr ktưn kơ sa ala čar Việt Nam mdrŏng sah, mơak mñai.

Pô mblang: Y-Ƀel Êban